طيب نمشي لي بداية العقل افتكر، نتكلم من النقطة اللي ذكّرنا أستاذ عبد الله أننا انتهينا ليها، اللي هو العقل الواعي.. وكان في كلام في آخر جلستنا البارحة أنه المجتمع هو العامل المباشر في الكبت.. وفي كانوا بعض الاخوان بيروا أنه العقل، اللي بيهو الكبت، هو سبب في المجتمع.. وناس آخرين كانو بيروا أنه هو نتيجة للمجتمع.. وأخير في الآخر افتكر اتصفَّت إلى أنه العقل نتيجة للمجتمع.. المجتمع يعني مجتمع الأحياء ومجتمع العناصر الحول الإنسان، البيئة.. من النقطة دي افتكر نقول كلمتين ونمِش لي قدام.. العقل برز كيف؟
أستاذ عبد الله بيرى أنه الرأي البيقول أنه العقل كان نتيجة للمجتمع ما هو سليم لأنه، وقيل البارحة وثابت، أنه الإنسان قبل العقل كان بيعيش، الحيوان يعني، بيعيش في مجتمع.. فإذا كان الحيوان بيعيش في المجتمع يبقى ما هو سليم أن يقال أنه العقل نتيجة المجتمع.. عايزين النقطة دي نسمع فيها (.....)
كانت تجارب وشوفته للنار واختراعه للمسائل المتقدمة بالصورة دي، دي متقدمة بالنسبة للنقطة النحن عايزنها، اللّي هي هل نشأ العقل، في بدايته البسيطة، قبل ما يمشى لتعقيد حياته ليكون مزارع أو صياد حتى، في مستوى تنظيمه البشري.. الحكاية الفارق بيها الحيوان، هل نشأت نتيجة للمجتمع، ولّا هي السبب في المجتمع؟ مفترق الطرق ده هي النحن عايزنه، بعدين بنمشي للتطوير ده، فإنت أحصر نفسك في ده.. مفترق الطرق اللي اختلف بيه الإنسان عن الحيوان هل كان المجتمع نتيجة فيه، والّا هو برز بطريقة تانية ونظم المجتمع؟ (.....)
[القهر الإرادي] بينتظم الحركة كلها، في مرحلة سُمي مباشر، في مرحلة سُمي شبه مباشر، في مرحلة سُمي غير مباشر.. لكن الحركة اللّاإرادية هي السبب في إبراز القدرة الإرادية والحركة الإرادية.. الحركة اللّاإرادية، الإنت قلتها، هي السبب في إبراز الحركة الإرادية.. يعني الغريزة هي الجرثومة بتاعة الفكر.. هل الغريزة إرادية؟ لا، ولكن العقل ما بيختلف منها إلا اختلاف مقدار.. كدي شوفوا النقطة دي، شوفها انت بالذات، الحركة اللا إرادية ما تفصلها من الحركة الإرادية.. الغريزة اللّي سايقة النحلة هي في جذور الفكر السايق الإنسان.. إلا إذا كان في اعتراض على الكلام ده.. في واحد بيفتكر أنه الحركة الإرادية جاية من غير الحركة اللّاإرادية؟ أو بمعنى آخر الفكر ما جاي من الغريزة؟ في اعتراض على ده؟
(.....) الصورة المشابهة ليهو اللي هي العقل البشري.. النقطة دي ربطها ببعض ضروري، وإلا بنكون بنفكر في منطقتين نحن، وده التوحيد يرفضه.. إذا كنا بنفتكر أنه في حاجة لا إرادية وفي حاجة إرادية، من الأول نحن اتجاهنا ما اتجاه التسليك، لان التسليك بيقوم على وحدة.
(.....) هو المطّور المادة، من اللّاإرادي أظهر الإرادي، وده ما سميناه المباشر وشبه المباشر وغير المباشر.. غير المباشر ده الحركة الإرادية، مثلا نحن جُعنا، لأننا جُعنا ابتدينا نتحرك لنحصّل الغذاء.. السبب المباشر عندنا في الحركة المباشرة دي أننا جُعنا، لكن وراء الجوع في عمل تاني.. العقل الكلّي بالجوع حرّكنا لنعمل.. فربط الأشياء بالصورة دي في تفكير تنتظمه الوحدة، بين اللاإرادي والإرادي، بيكون التوحيد.. لكن إذا قلنا ده لا إرادي وده إرادي، وعملنا بيناتن خط فاصل، بيكون في تعدد في التفكير وما بينسجم.. والوجود وحدة كلها.. الوجود وحدة والفكر وحدة والحياة وحدة، والتوحيد هو الأصل.
-