واشوقي لولاد أميّ * قالها النبي الأمي * واشوقنا ليهو كمان
بسم الله قت بي فميّ * تقوي لي حاسة شميّ * أشم بها العدنان
تكلت عليك هميّ * تفتح تزيل لي غميّ * ياربي يا منّان
شمّر سابق لُه ملم * متل المنصوب لُه علم * وصفو كدي الصحبان
العافي الناس وحلم * واسع لغيظه كظم * دا الخلقه القرآن
دا الشرع في أقواله * والسنة دي أعماله * نبيا عظيم الشأن
شوفو الحقيقة حاله * أريت حالي أحواله * البس دوام طربان
نحن الأغراب أخوانو * اشتاقنا جم صحبانو * بي ذكروا للاخوان
معاهو نعيش بأمانو * نحي السّنة وقرآنو * تغبطنا علي النبيان
ليهو وقتا عند ربّه * ولا جبريل بي قربه * يتحمل ليهو كان
ولا نبي مرسلبُه * دي ولايته الماهل شربه * اسقيني انا عطشان
متوكل بي بصيرة * طاهر السر والسريرة * كفاف رزقو وقنعان
منفق ماليهو دخيرة * كانز الله يا الدّخيرة * بيقينو والعرفان
دا الغانه انواره * سبعين مرة استغفاره * في الضي والليل حلكان
ماهو غان أغيار * نورا خاطف ابصاره * سيرا للذات بأمان
صلاتي ربيّ الكالا * يصلك يا أحمد فالا * تنمو بالكمان
تنجي السامعين والقالا * نالوبا مقاما ومحالا * بفضل الله واحسان
ود لطفي جابا هدية * طمعان قصدي الفردية * أصلو واكون رضيان
ومرضي والمهدية * واخواتي غير عددية * ياربي والاخوان
